Leikskólinn Kvistaborg - framkvæmdir
Myndir
Hvað verður gert?
Unnið er að undirbúningi að gagngerum endurbótum á leikskólanum Kvistaborg. Við hönnunarvinnu hefur verið lagt upp með að nýta burðarvirki húsanna að hluta til en við nánari skoðun teljast undirstöður hússins ekki nægjanlega burðarhæfar.
Verið er að meta forsendur verkefnisins upp á nýtt en starfsemi leikskólans fer fram í færanlegum kennslustofum á lóð leikskólans og við Fossvogsskóla.
Hvernig gengur?
Júní 2026
Gerð hefur verið ástands- og burðarþolsúttekt á undirstöðum hússins en hönnunarforsendur gera ráð fyrir að þeim sé haldið eftir ásamt hluta af steyptum veggjum og hluta af gólfplötum.
Niðurstöður úttektarinnar gefa skýrt til kynna að best fari á því að fjarlægja undirstöðurnar í heild sinni.
Fjárhagslegar forsendur og tímalína verkefnisins hafa því breyst umtalsvert en meta þarf forsendur verkefnisins upp á nýtt til samræmis við fjárfestingaáætlun borgarinnar.
Maí 2025
Lagt fyrir og samþykkt í Borgarráði að hefja innkaupaferli á framkvæmdum við nýbyggingu á lóð skólans.
Verkfræðistofan Efla mælir með að farið verði í gagngerar endurbætur á elsta hluta skólans sem byggður var 1972 og hentar illa starfi nútíma leikskóla.
Endurbæturnar á húsnæði Kvistaborgar munu m.a. ganga út á að:
- Stækkun húsnæðis
- Aukið við lofthæðina í húsunum
- Þak verður endurnýjað
- Hljóðvist bætt með nýju loftaefni
- Ljósvist verður bætt
- Loftræsting verður sett í allt húsið
- Gluggar endurnýjaðir
- Hiti settur í gólf
- Hús einangrað að utan
- Ný gólfefni
- Allt húsnæðið málað
- Salerniskjarnar verða endurnýjaðir
Mars 2025
Ákveðið að Kvistaborg fái afnot af færanlegum einingahúsum við Fossvogsskóla (Eyland).
Nóvember 2022
Hönnun og þarfagreining hefur verið í höndum Arkþing Nordic ehf arkitekta og Mannvits. Gert er ráð fyrir að útboðsgögn fyrir framkvæmdina verði tilbúin í lok árs 2024.
Desember 2021
Verktaki kom með kennslustofur á lóð skólans í byrjun mánaðar. Fyrirhugaðar kennslueiningar sem verða á bílastæði eru verða fluttar á staðinn um miðjan mánuð. Töluverður undirbúningur hefur verið fyrir komu kennslustofanna og hefur vinna verktaka staðið yfir síðastliðnar vikur. Meðfram þessari vinnu hefur verið gerður stoðveggur sem afmarkar lóð leikskólans við göngustíg og bílastæði.
Október 2021
Vinna við smíði á færanlegum kennslustofum sem komið verður upp á lóð Kvistaborgar gengur vel. Stofurnar verða byggðar að fullu hjá seljanda og fluttar fullbúnar í Fossvoginn. Þær verða með svipuðu sniði og nýjar stofur við leikskólann Gullborg við Rekagranda, þó ekki af nákvæmlega sömu stærð og ytri hönnun verður í stíl við þær byggingar sem eru fyrir á lóðinni.
Til viðbótar verður áfram hægt að nota stoðrými, sal og eldhús og svo verða settar upp tvær færanlegar einingastofur til viðbótar til að auka það húsrými sem leikskólinn hefur til umráða á meðan framkvæmdatíma stendur. Þessar einingastofur eru frá sama framleiðanda og stofurnar við Fossvogsskóla og í leikskólanum Laugasól í Laugalæk.
September 2021
Húsnæðismál Kvistaborgar eru til athugunar hjá Eignaskrifstofu og Skóla- og frístundasviði. Verið er að skoða hvaða leiðir verða farnar í endurgerð Kvistaborgar áður en framkvæmdir hefjast.
Skrifstofa framkvæmda og viðhalds heldur utan um greiningu á húsnæðinu og hefur fengið Eflu til þess að meta ástand húsnæðisins.
